පින්නවල ට පසු තවත් දුම්රිය නැවතුම් පොල දෙකක් කෙටි දුරක් තුළ හමු වේ. ඒවා ද අතිශය ග්‍රාම්‍ය පරිසරයක පිහිටා අැත. හාත්පස දිස්වන්නේ කොළ පැහැති වන රොද යි. ප්‍රධාන මාර්ග කිසිවක් අාසන්නයේ නොමැත. මුළින් ම හමුවන්නේ ගම්මාන යි.
 |
| ගම්මාන දුම්රිය නැවතුම් පොල නාම පුවරුව |
ගම්බද දුම්රිය නැවතුම් පොල වල පවා සැලකිය යුතු මගීන් සංඛ්‍යාවක් සිටීම සතුට ට කරුණකි.
 |
| ගම්මාන දුම්රිය නැවතුම් පොල |
 |
| ගම්මාන සහ මොරකැලේ අතර කුඩා අැළ මාර්ගයක් |
 |
| ගම්මාන පසුකර මොරකැලේ බලා යමින් |
මීළඟ දුම්රිය නැවතුම් පොල මොරකැලේ. සෑම නැවතුම් පොලක ම අැත්තේ එකම අාකාරයේ ගොඩනැගිල්ලකි. එකම කාලයක එකම ව්‍යාපෘතියක් යටතේ ඉදිවුනු බැවින් එසේ වී අැතැයි සිතිය හැක.
ගම්මාන සහ මොරකැලේ අාසන්නයේ අැත්තේ ග්‍රාම්‍ය පරිසරයකි. දුම්රිය චාරිකාව අතරතුර අප දුටු කදිම දසුනක් ලියා තැබීමට සිත් වේ. දුම්රිය එකවරම වේගය අඩු කරන බවක් අපට දැනුනි. එහෙත් එ් දුම්රිය ස්ථානයක් අසල නොමැති ප්‍රදේශයකි. කවුළුවෙන් ඉවත බැලූ අපට දැක ගත හැකි වූයේ දුම්රිය මාර්ගය අසල පිහිටි නිවසකින් පැමිණි පුද්ගලයෙක් රඹුටන් වල්ලක් රියදුරු මහතාට දෙන අයුරු යි. දුම්රිය නතර කළේ ද නැත. ධාවනය වන දුම්රියෙන් ටැබ්ලට් හුවමාරු කරන ලෙසින් රඹුටන් වල්ලද සුරක්ෂිතව මාරු විය. මෙවැනි දසුන් නෙත ගැටෙන්නේ කැළණි වැලී මාර්ගයේ පමණි.
 |
| මොරකැලේ දුම්රිය නැවතුම් පොල |
මොරකැලේ සහ වග දුම්රිය ස්ථාන අතර වක් ඔය හරහා අැති පාලම හමුවේ. එය පැරණි පාලමකි. වක් ඔය යනු කැළණි ගඟේ අතු ගංගාවකි. වග ඉතාම සුන්දර ප්‍රදේශය කි. වක් ඔය එහි සුන්දරත්වය වැඩි කරයි. දුම්රිය මාර්ගය දෙපස ද දිස්වන්නේ වන ලැහැබ යි. එය වක් ඔය ගලා බසින බිම් තීරය බැවින් සශ්‍රීකත්වයෙන් අනූන ය. පහතරට තෙත් කලාපීය වනාන්තර ලක්ෂණ මැනවින් දැක ගත හැක.
 |
| වක් ඔය හරහා වැටී අැති පාලම |
සුන්දර පරිසරයක් මැද මීළඟට හමුවන්නේ වග දුම්රිය ස්ථානය යි. මෙහි ස්ථාන නාමය සම්බන්ධව සිහිපත් වන විශේෂ කාරණයක් සඳහන් කරමි. සාමාන්‍යයෙන් දුම්රියක් ධාවනය වීමට පෙර එය නවත්වන ස්ථාන ගමනාන්තය අාදී තොරතුරු මගී ජනතාවගේ දැන ගැනීම පිණිස ශබ්ද විකාශන යන්ත්‍ර භාවිතයෙන් නිවේදනය කෙරේ. බොහෝ විට ඒ සඳහා විශේෂ ශෛලියක් ද අනුගමනය කෙරෙනු ලැබේ. දුම්රිය ධාවනය වන්නේ කුමන දුම්රිය ස්ථානයකට ද යන්න කියැවෙන්නේ "මහනුවර බලා පිටත් වේ", "අවිස්සාවේල්ල බලා පිටත් වේ", "පොල්ගහවෙල බලා පිටත් වේ" යනාදී වශයෙනි. නමුත් "
වග බලා පිටත් වේ" යැයි කී විට වෙනත් අර්ථයක් (වගකීමක් බඳු අදහසක්) ජනිත වන බැවින් "
වග දුම්රිය ස්ථානය බලා පිටත් වේ" යැයි සම්පූර්ණ කර කියනු ලැබේ. මෙම නිවේදනය කොළඹ කොටුව සහ මරදාන දුම්රිය ස්ථාන වල සවස පහ ත් හය ත් අතර නිකුත් වනු අයුරු සවන් දිය හැක.
 |
| වග දුම්රිය ස්ථානය |
වග දුම්රය ස්ථානයේ වේදිකා අැත්තේ එකක් පමණි. නමුත් අමතර මාර්ගයක් අැති බැවින් දුම්රිය දෙකක් මාරු කිරීමට පහසුකම් අැත. වග දුම්රිය ස්ථානය අසලින් කළුඅග්ගල - ලබුගම මාර්ගය දුම්රිය මාර්ගය හරහා ගමන් කරයි.
 |
| වග දුම්රිය ස්ථානයේ පැරණි බඩු ගබඩාව |
වග දුම්රිය ස්ථානයෙන් පසු විශාල වංගු කිහිපයක් සහිත ප්‍රදේශයකට යොමු වේ. ඡායාරූප වලින් දැක්වෙන්නේ එම වංගුව වලින් එකකි. මාර්ගයේ වම් පසින් එක එල්ලේ දිස්වන්නේ වෙල් යාය යි. එබැවින් වංගුව ගන්නා විට මුළු දුම්රිය ම එක වර හොඳින් දර්ශනය වේ. මේ තරම් විශාල වංගු පැවතීමට හේතුව ඒවා පටු අාමාන මාර්ගයට සැකසූ නිසා විය යුතු ය. පටු අාමාන මාර්ගයට අවශ්‍ය වන්නේ අඩු අරයක් සහිත වංගු ය. වග ප්‍රදේශයෙන් ඔබ්බට මනස්කාන්ත දසුන් පෙලක් සමග දුම්රිය මීළඟට ළඟා වන්නේ කඩුගොඩ දුම්රිය නැවතුම් පොලට යි. කඩුගොඩ අාසන්නයෙන්ම අරපන්ගම හමුවේ. මේ නැවතුම් පොල දෙකම ග්‍රාමීය ජනතාවගේ ප්‍රවාහන පහසුව සඳහා ඉදි කර අැත. කලින් සඳහන් කළ පරිදි කඩුගොඩ හා අරපන්ගම ද එකම සැලැස්මකට ඉදිවී අැත.
 |
| වග සහ කඩුගොඩ අතර හමුවන විශාල වංගුව |
 |
| වග සහ කඩුගොඩ අතර හමුවන විශාල වංගුව |
වංගු සහිත ස්ථාන වල අැති දුම්රිය හරස් මාර්ග ඉතා අනතුරුදායක ය. විශේෂයෙන් අාරක්ෂිත ගේට්ටු නොමැති තැන් වල වාහන දුම්රිය මාර්ගය හරහා යෑමේදී අවදානම අධික වේ. එවැනි ස්ථාන වල මාර්ගය දෙපස හොඳින් දර්ශනය වීමට තරමක් විශාල උත්තල දර්පණ යොදා අැත. පහත ඡායාරූපයේ දැක්වෙන්නේ එවන් උත්තල දර්පණයකි. දුම්රිය රියදුරුට ද මාර්ගය අසලට එන වාහන දැක ගත හැක. ඡායාරූපයේ එවන් දසුනක් මනාව පිළිබිඹු වේ. එහි දැක්වෙන රථයට සාමාන්‍යයෙන් දර්පණය නොමැතිව දුම්රිය පැමිණෙන බව පෙනෙන්නේ අාසන්නයට ම ළඟා වූ පසු ය. බලවේග දුම්රිය වල එන්ජිම රහිත එලැවුම් මැදිරියෙන් ධාවනය කරන විට එන්ජිමේ හඬ ද අැසෙන්නේ සෑහෙන තරම් ළං වූ පසු ය.දර්පණය නිසා වැඩි දුරක සිට දුම්රිය දර්ශනය වේ. මෙය දැනට දුම්රිය හරස් මාර්ග වල අනතුරු අවම කිරීමට ගෙන අැති සාර්ථක වැඩ පිළිවෙලකි.
 |
| වංගු සහිත ස්ථානයක දුම්රිය හරස් මාර්ගයකට යෙදූ උත්තල දර්පණයක් |
මීළඟට හමුවන්නේ කොස්ගම දුම්රිය ස්ථානය යි. එහි වේදිකා දෙකක් අැත. තරමක් විශාල දුම්රිය ස්ථානයක් වන කොස්ගම වැදගත් වන්නේ මෙතෙක් දුම්රිය මාර්ගයෙන් අෑත්ව ගිය කොළඹ - අවිස්සාවේල්ල A4 මාර්ගය යළිත් දුම්රිය මාර්ගය අසලට පැමිණීම යි. මෙතැන් සිට තවත් සැලකිය යුතු දුරක් දුම්රිය මාර්ගයට වම් පසින් සමාන්තරව එය ගමන් කරයි.
 |
| කොස්ගම දුම්රිය ස්ථානය |
 |
| කොස්ගම දුම්රිය ස්ථානයේ නාම පුවරුව |
 |
| කොස්ගම දුම්රිය ස්ථානය |
කොස්ගම දී දුම්රිය මාර්ග නඩත්තු සේවයේ යෙදෙන සේවක මහතුන් කිහිප දෙනෙක් සිය උපකරණ ද රැගෙන සූදානමින් සිටි බව දක්නට ලැබුණි. ඒ අතර තිබූ එක් සුවිශේෂී උපකරණයක් ඡායාරූපගත කළෙමි. එය රේල් පීලි නැවීමට ගන්නා උපකරණයක් බව වටහා ගත හැකි විය.
 |
| රේල් පීලි නැවීමට යොදා ගන්නා උපකරණයක් - කොස්ගම දී |
 |
| කොස්ගම දී හමු වූ ම්තුරන් දෙදෙනෙක් |
මීළඟට හමුවන්නේ අළුත් අම්බලම නැවතුම් පොල යි. ඒ අසලින්ම දකුණු පසින් පෙනෙන්නේ කොස්ගම මහා විද්‍යාලය යි. වම් පසින් අවිස්සාවේල්ල A4 මාර්ගය යි. නැවතුම් පොල පාසල අසලම පිහිටා තිබුණත් පාසල් සිසුන් දුම්රියෙන් ගමන් කරන බවක් අනුමාන කළ නොහැක. මන් ද යත් උදෑසන හෝ පාසල් නිම වන වේලාවට අළුත් අම්බලමට දුම්රියක් ධාවනය නොවේ. කෙසේ වෙතත් කොස්ගම මහා විද්‍යාලය පිහිටා අැති අයුරු මෙම දුම්රිය නැවතුම් පොලට මනා ව දර්ශනය වේ.
මෙතැන් සිට ඉදිරියට අැදෙන මාර්ගය තියුණු වංගු කිහිපයක් පසු කරන්නේ මහා මාර්ගයට සමාන්තරව ය. දුම්රිය මාර්ගය මහා මාර්ගයට මදක් උසින් පිහිටා අැත. එසේ නොවන්නට මේ දර්ශනය ඉන්දියාවේ සුප්‍රකට ඩාර්ජීලින් - හිමාලයන් දුම්රිය මාර්ගය සිහිගන්වයි. හින්දි සිනමාවේ අතිශය ජනප්‍රියත්වයට පත් "අාරාධනා" චිත්‍රපටයේ දුම්රිය සහ සමාන්තරව ගමන් කරන රථයක රූගත කළ ගීත ජවනිකාවක ද සිහිපත් වේ.
 |
| මිරිස්වත්ත දුම්රිය නැවතුම් පොල |
මිරිස්වත්ත පසු කර ඉදිරියට අැදෙන විට A4 මාර්ගය දුම්රිය මාර්ගයේ දකුණු පසට මාරු වේ. මේ A4 මාර්ගයට යෙදෙන දෙවන හරස් මාර්ගය යි. එතැන් සිට මද දුරකින් හිඟුරල දුම්රිය නැවතුම් පොල දක්නට ලැබේ. මෙයද කුඩා වේදිකාවකට පමණක් සීමා වූ නැවතුම් පොලකි.
 |
| හිඟුරල දුම්රිය නැවතුම් පොල සහ A4 අවිස්සාවේල්ල මාර්ගය |
 |
| හිඟුරල දුම්රිය නැවතුම් පොල |
 |
| හිඟුරල දුම්රිය නැවතුම් පොල |
හිඟුරල ට පසු යළිත් මාරු වන A4 මාර්ගය දුම්රිය මාර්ගයේ වම් පසට පැමිණේ. මේ A4 මාර්ගයේ තුන්වන දුම්රිය හරස් මාර්ගය යි.
පුවක්පිටියට පසු අවිස්සාවේල්ල දක්වාම තියුණු වංගු රැසක් පසු කරයි.
 |
| තියුණු වංගුවක් පසු කරමින් |
මීළඟට තවත් දුම්රිය නැවතුම් පොලක් හමු වන අතර එය පුවක්පිටිය නගරය යි. වේදිකාවක් සහ නාම පුවරුවකට වැඩි යමක් එහි දැකගත නොහැක.
 |
| පුවක්පිටිය නගරය දුම්රිය නැවතුම් පොල |
පුවක්පිටිය නගරය නැවතුම් පොලට පසු යළිත් දුම්රිය හරස් මාර්ගයක් හමු වේ. ඒ පස් වැනි සහ අවසන් වරට A4 මාර්ගය හරහා යෑම යි. දැන් යළිත් A4 මාර්ගය වම් පසිනි. අවිස්සාවේල්ලට යන තුරු මෙලෙසින්ම ගමන් කරයි.
 |
| පුවක්පිටිය නගරය පසු කළ විට නැවතත් A4 මාර්ගය හරහා ගමන් කරයි |
අවිස්සාවේල්ලට පෙර හමු වන අවසාන නැවතුම් පොල කිරිවන්දල යි. මහා මාර්ගයට තරමක් අෑතින් පිහිටි කිරිවන්දල ද වේදිකාවක් පමණක් අැති කුඩා නැවතුම් පොලකි. මෙතැන් සිට අවිස්සාවේල්ල දක්වා යළිත් තියුණු වංගු කිහිපයක් පසු කරයි.
 |
| කිරිවන්දල දුම්රිය නැවතුම් පොල |
 |
| අවිස්සාවේල්ලට නුදුරුව ද්විත්ව වංගුවක් |
කොළඹින් පටන් ගෙන හෝරා දෙක හමාරක පමණ ගමනකින් පසු අවිස්සාවේල්ලට ළඟා වේ. අප පිවිසෙන්නේ ඓතිහාසික සීතාවක පුරවරයට යි.
දුම්රිය ගමනාන්තයට පැමිණි වගයි.
දුම්රිය ස්ථානයෙන් මීටර 400ක් පමණ දුරකින් අවිස්සාවේල්ල නගරය පිහිටයි. බස් නැවතුම් පොල නගරයට පිවිසෙන විටම හමු වේ. අවිස්සාවේල්ල මූළික රෝහල දුම්රිය ස්ථානයෙන් මීටර 200 ක තරම් දුරක පිහිටා අැත.
 |
| අවිස්සාවේල්ල දුම්රිය ස්ථානයේ නාම පුවරුව |
අවිස්සාවේල්ල දුම්රිය ස්ථානය තරමක් විශාලය. දිනපතා සේවයට යන මගී ජනතාවගෙන් උදෑසන කාර්යබහුල වූවත් දිවා කාලයේ සැලකිය යුතු මගීන් සංඛ්‍යාවක් මෙහි නොරැඳේ. දහවල් කාලයේ කොළඹ කොටුව බලා ධාවනය වන්නේ එක් දුම්රියක් පමණි. බොහෝ විට අවිස්සාවේල්ල ප්‍රදේශයේ ජනතාව ගමනාගමනය සඳහා යොදාගන්නේ බස් මාර්ගය යි. එබැවින් දුම්රිය ට ලැබී ඇත්තේ දෙවන තැන යි. අතීතයේ කැළණි වැලී මාර්ගය යටියන්තොට දක්වා ත් රත්නපුර මාර්ගය ඕපනායක දක්වාත් විහිදුනු සමයේ මීට වඩා වැඩි මගී පිරිසක් මෙහි රැඳෙන්නට අැතැ යි සිතිය හැක. පර්යන්ත දුම්රිය ස්ථානයක ස්වභාවය අවබෝධ කර ගැනීමට අවිස්සාවේල්ල කදිම ස්ථානය කි. එයට හේතුව දුමරිය මාර්ගය අවසන් වන ස්ථානය (Dead end) දුම්රිය ස්ථානයට අාසන්නවම පැවතීම යි. අැතැම් ගමනාන්ත දුම්රිය ස්ථාන වල මාර්ගයේ අවසානය තරමක් දුරින් පිහිට යි. අවිස්සාවේල්ලේ දී එය එක එල්ලේ ම දර්ශනය වේ.
 |
| කැළණි වැලී දුම්රිය මාර්ගයේ අවසානය |
 |
| කැළණි වැලී දුම්රිය මාර්ගයේ අවසානය. යටියන්තොට හෝ රත්නපුරයට යාමට අද අවකාශ අැත. |
 |
| අවිස්සාවේල්ලට ළඟා වූ දුම්රිය නැවත කොළඹ බලා ධාවනය වීමට පෙර |
පර්යන්ත දුම්රිය ස්ථානයක් ලෙස අද සැලකෙන අවිස්සාවේල්ල අතීතයේ දුම්රිය මංසන්ධියකි. කැළණි වැලී මාර්ගය මරදාන සිට අවිස්සාවේල්ල හරහා යටියන්තොට දක්වා විහිදී තිබුණි. සැබැවින්ම කැළණි වැලී මාර්ගය කැළණි ගංගාවට අාසන්න ව ගමන් කළේ අවිස්සාවේල්ලෙන් පසු යටියන්තොට දක්වා වූ කොටසේදී ය. පසු කලෙක අවිස්සාවේල්ලෙන් අාරම්භව රත්නපුරය හරහා ඕපනායක දක්වා දුම්රිය මාර්ගයක් ඉදි විය. ඒ අනුව ගත් කල අවිස්සාවේල්ල යනු රත්නපුර දුම්රිය මාර්ගයේ අාරම්භය යි. විවිධ හේතු නිසා අවිස්සාවේල්ල සිට යටියන්තොට දක්වා මාර්ගය වසා දමා තිබේ. ඉන් අනතුරුවත් රත්නපුර මාර්ගය දිගටම භාවිතා විය. එකල මරදාන සිට ඕපනායක දක්වා එකම දුම්රිය මාර්ගයක් ලෙස පැවතුන බැවින් බොහෝ දෙනා වටහාගෙන තිබුනේ කැළණි වැලී මාර්ගය යනු රත්නපුර මාර්ගය ලෙස යි. නමුත් මුලින් ඉදිවූයේ යටියන්තොට මාර්ගය බැවින් නියම කැළණි වැලී මාර්ගය යනු මරදාන සිට යටියන්තොට දක්වා විහිදුනු මාර්ගය බව ප්‍රකාශ කිරීම යුක්ති සහගත යැයි සිතමි. මේ සඳහා ඓතිහාසික සාධකයක් ලෙස හෙන්රි ඩබ්ලිව්. කේව් (Henry W. Cave) නම් බ්‍රිතාන්‍ය ජාතික කතුවරයාගේ "ද සිලෝන් ගවර්න්මන්ට් රේල්වේ" (The Ceylon Government Railway) නම් ගවේෂණාත්මක කෘතිය පෙන්වා දිය හැක. එහි ප්‍රථම මුද්‍රණය 1910 ජූලි මස නිකුත් වී අැත. එම ග්‍රන්ථයේ 30 වන පිටුවේ සඳහන් වන පරිදි අවිස්සාවේල්ල සිට රත්නපුර දක්වා මාර්ගය ඒ වකවානුවේ ඉදිවෙමින් පැවතී අැත. කැළණි වැලී මාර්ගයේ අවසානය ලෙස දක්වා අැත්තේ යටියන්තොට යි.
මාගේ චාරිකා මීට දශක හතරකට හෝ පහකට පෙර අැරඹුනේ වී නම් අවිස්සාවේල්ල යනු ගමන් මගෙහි එක් සන්ධිස්ථානයක් පමණක් වනු අැත. එනම් මා තවත් බොහෝ දුරක් ගොස් මේ ලිපිය ලියන්නේ යටියන්තොට හෝ ඕපනායක ගැන වන්නට තිබුණි.
 |
| අතීතයේ තවත් බොහෝ දුරක් ඉදිරියට අැදුනු කැළණි වැලී මාර්ගය අද අව්ස්සාවේල්ලෙන් කෙළවර වන අයුරු |
 |
| අවිස්සාවේල්ල සිට කොළඹ දෙසට මාර්ගය පෙනෙන අයුරු |
 |
| අවිස්සාවේල්ල දෙවන වේදිකාව |
 |
| අවිස්සාවේල්ල පළමුවන වේදිකා මාර්ගය කෙළවර වන අයුරු |
 |
| අවිස්සාවේල්ල මගී පාලම අසල නාම පුවරුව |
අවිස්සාවේල්ල දුම්රිය ස්ථානයේ වේදිකා දෙකකි. පළමුවන වේදිකාවට දුම්රිය පැමිණෙන අතර පිටත් වන්නේත් එහි සිට යි. දුම්රිය දෙකක් පැමිණි අවස්ථාවක දෙවන වේදිකාව ද ප්‍රයෝජනයට ගැනේ. වේදිකා අතර මාරු වීමට මගී පාලමක් අැත. වේදිකා දෙක අතර මැද තවත් මාර්ගයක් අැත. එය යොදා ගැනෙන්නේ දුම්රිය ගාල් කිරීමට යි. දැනට කැළණි වැලී මාර්ගයේ ධාවනය වන්නේ මගී ප්‍රවාහන බලවේග (Power set) දුම්රිය පමණි. එබැවින් දුම්රිය පැමිණි අයුරින්ම අාපසු ධාවනය කිරීමට හැකි ය. නමුත් එන්ජින් යෙදූ දුම්රියක් ගමනාන්තයට පැමිණි විට එහි එන්ජිම ගලවා දුම්රියේ අනෙක් කෙළවරට අෑඳිය යුතු ය. එම කටයුත්ත සඳහා ද මුළින් සඳහන් කළ මාර්ගය යොදා ගැනේ. සාමාන්‍යයෙන් දුම්රිය මාර්ග කෙළවර වන දුම්රිය ස්ථානයක එන්ජින් හැරවීම සඳහා හැරවුම් වේදිකාවක් (Turn table) අැතත් අවිස්සාවේල්ලේ දී එවැන්නක් දැක ගත නොහැක. මුළුමනින්ම බලවේග දුම්රිය ධාවනය වීමත් කලාතුරකින් පැමිණෙන එන්ජිමක් වූව ද හැරවීමකින් තොරව නැවත ධාවනය කරවීමට හැකි වීමත් නිසා හැරවුම් වේදිකාවක අවශ්‍යතවය අවිස්සාවේල්ලට නැතැයි අනුමාන කළ හැක
 |
| අවිස්සාවේල්ල දුම්රිය ස්ථානයේ පළමුවන වේදිකාව |
 |
| කැළණි වැලී මාර්ගයේ සාර්ථක ම දුම්රිය S8 බලවේග දුම්රිය යි. |
 |
| දුම්රිය රියදුරු විසින් වායු ටැංකියේ පීඩනය පරීක්ෂා කෙරෙමින් |
 |
| අවිස්සාවේල්ල දුම්රිය ස්ථානයේ හස්ත ක්‍රියාකාරී රේල් පාර මාරු කරනය (Tracks change) |
කැළණි වැලී දුම්රිය මාර්ගය සම්පූර්ණයෙන් අාවරණය කිරීමට එක් දින චාරිකාවක් ප්‍රමාණවත් වේ. එහි යෑමට බලාපොරොත්තු වන අයෙක් උදෑසන කොළඹ කොටුවෙන් හෝ මරදානෙන් ගමන් අාරම්භ කළොත් සවස 3:30 පමණ වන විට නැවත කොළඹ කොටුව වෙත ළඟා විය හැක. මගී තදබදය අවම බැවින් චාරිකාවක අත්දැකීම් නියමාකාරයෙන් අත්විඳීමට අවකාශ අැත. සාමාන්‍යයෙන් චාරිකා සඳහා භාවිතා නොවන මාර්ගයක් වූව ද කැළණි වැලී මාර්ගයේ අැති ස්වභාව සෞන්දර්යය ඉතා ඉහළ ය. ලංකාවේ සුන්දර තැන් සොයන අයට කොළඹින් වැඩි දුර නොයා එක් දින චාරිකාවක් ලෙස කැළණි වැලී මාර්ගයේ ගමන් කළ හැක. බේස්ලයින්, නාරාහේන්පිට වැනි කලබලකාරී පරිසරයකින් අාරම්භ වී කෙත් වතු හා වන ලැහැබ් පසු කර පැමිණි කැළණි වැලි දුම්රිය චාරිකාව මෙයින් අවසන් වේ.
ප.ලි. දුම්රිය ගමනට සහභාගි වූ මගේ මිත්‍ර බුද්ධික ද සිල්වා මහතාට ත් ලලිත් සමලිඅාරච්චි මහතාට ත් විශේෂ ස්තූතිය පිරිනැමේ. ගමන අතරතුර සිදුවූ තවත් රසවත් සිදුවීමක් දක්වනු කැමැත්තෙමි. මගේ මිත්‍රයා හැම විටම දුම්රියට ගොඩවන වයස්ගත අයට නැගීමට අත දී උපකාර කරයි. එසේ උදව් ලැබූ වයස්ගත අම්මා කෙනෙක් ප්‍රතිඋපකාර ලෙස අැය ගෙන අා රඹුටන් පාර්සලයෙන් ගෙඩි කිහිපයක් ඔහුට පරිත්‍යාග කළාය. අතිශයින් ග්‍රාම්‍ය වූ පරිසරයක් මැදින් යන කැළණි වැලී මාර්ගයේ මගීන් අතර අන්‍යෝන්‍ය සුහදතාව ප්‍රකට කරන සිදුවීමක් ලෙස මෙම සිද්ධිය ඉදිරිපත් කළ හැකි බව මට හැඟුනි.
No comments:
Post a Comment